جرمنی میں غیر ملکی جاسوسی کی بڑھتی سرگرمیاں، جرمن انٹیلیجنس

ایم اے ڈی کی سربراہ مارٹینا روزنبرگ نے جرمن نیوز ایجنسی ڈی پی اے کو بتایا کہ ان کے ادارے نے بیرونی خفیہ ایجنسیوں کی طرف سے جرمنی میں جاسوسی کی متعدد کوششوں کا سراغ لگایا ہے۔

ماسکو نے ایڈورڈ اسنوڈن کو روسی شہریت دے دی

انہوں نے کہا کہ حریف ریاستوں کی ہدایات پر عمل کرتے ہوئے ان ممالک کی انٹیلیجنس ایجنسیاں اہم اور قابل استعمال معلومات کے حصول کے لیے ہر ممکن ذرائع استعمال کرتی ہیں اور ان کی کوشش ہوتی ہے کہ اپنے ملک کے مفادات کے پیش نظر وہ ہر طرح کا دباؤ بھی استعمال کریں۔

روزنبرگ نے کہا، ''جرمنی کی ملٹری کاؤنٹر انٹیلیجنس نے جاسوسی کی ایسی کئی کوششوں کا پتہ چلایا ہے۔‘‘

وارننگ کا لیول پہلے ہی ہائی الرٹ پر

فیڈرل جرمن آرمی کی کاؤنٹر انٹیلیجنس سروس کی سربراہ کے مطابق یوکرین میں چوبیس فروری کو کی جانے والی روسی فوجی مداخلت سے پہلے بھی وفاقی جرمن فوج کی جاری کردہ جرمنی میں غیر ملکی اداروں کی طرف سے جاسوسی کے خلاف وارننگ ہائی الرٹ پر تھی۔

ایران: فرانسیسی شہری کو جاسوسی کے الزام میں آٹھ برس قید کی سزا

مارٹینا روزنبرگ نے ڈی پی اے کو بتایا کہ حال ہی میں سب سے زیادہ واقعات ایسے ڈرونز کی پروازوں سے متعلق تھے، جو جرمنی میں وفاقی فوج کی حساس عسکری تنصیبات اور یوکرینی دستوں کے لیے قائم کردہ فوجی تربیتی مراکز کی فضا میں اڑ رہے تھے۔

انہوں نے کہا کہ یہ بات اب تک غیر واضح ہے کہ ان ڈرون پروازوں کے پیچھے کون تھا۔

جرمنی کی ملٹری کاؤنٹر انٹیلیجنس کی حکمت عملی

اگست 2018ء سے اپنے موجودہ منصب پر فائز مارٹینا روزنبرگ نے بتایا کہ وفاقی جرمن فوج کے خلاف غیر ملکی جاسوسی کی سرگرمیاں روسی یوکرینی جنگ سے پہلے بھی کافی زیادہ ہو چکی تھیں۔

جرمنی میں روس کے لیے جاسوسی کرنے والا برطانوی شہری گرفتار

انہوں نے اپنے ادارے کی حکمت عملی کی وضاحت کرتے ہوئے کہا، ''ہماری کارکردگی کا محور ملک میں جاسوسی کی غیر ملکی سرگرمیوں کا پتہ چلانا ہے، موجودہ حالات میں خاص طور پر روسی اور چینی خفیہ اداروں کی طرف سے، تا کہ ان کا ابتدائی مراحل ہی میں سراغ لگاتے ہوئے اور قومی اور بین الاقوامی پارٹنر انٹیلیجنس اداروں کے تعاون سے مؤثر اور قبل از وقت تدارک کیا جا سکے۔‘‘

م م / ش ح (ڈی پی اے، ڈی پی اے کیو)